|
|
|
|
سألناه : هل أدليت بصوتك في التعديلات.. قال : يعني صوتي "هيقدم ولا يأخر".. شعبان عبد الرحيم يتمنى إحياء فرح جمال وخديجه
|
| كتب حسين عودة (المصريون): : بتاريخ 7 - 4 - 2007 |
قال المطرب الشعبي شعبان عبد الرحيم إنه يتمنى أن يشارك في إحياء حفل زفاف جمال مبارك الشهر القادم على الآنسة خديجة الجمال ، رافضًا أن تكون أغانيه ذات الصبغة السياسية تحمل انتقادات للحكومة كما يقال.
وأضاف "شعبولا" الذي اشتهر بأغانيه المواكبة للأحداث والمناسبات السياسية في حوار خاص بـ"المصريون" إنه لم يشارك في الاستفتاء على التعديلات الدستورية، لأنه استيقظ من نومه متأخرًا، ولأنه يعلم أن صوته "لن يقدم أو يؤخر" في النتيجة.
وفي الوقت الذي أكد فيه أنه يجهل أسماء الأحزاب على الساحة السياسية باستثناء الحزب "الوطني" "حزب الريس" و"الوفد" لأنه أحيا مناسبات لبعض الأعضاء فيه، قال "شعبولا" الذي كانت بداية شهرته مع أغنية "بأحب عمرو موسى وبأكره إسرائيل" إنه يفكر في إطلاق حزب سياسي سيختار له اسم "ولاد الحارة".
وإلى نص الحوار الذي أجراه "شعبولا" مع "المصريون" على إحدى مقاهي المهندسين:
*إيه رأي شعبان عبد الرحيم في التعديلات الدستورية ؟
- بصراحة أنا ما كنتش متابع الفترة اللي فاتت لكن أنا سمعت إن في ناس عملوا "عوق" مع الحكومة عشانها وخرجوا في الشارع وعلموا شبورة، وقالوا إن أي حد ممكن الحكومة تقبض عليه لو حطتوا في دماغها وزعلها.. يعني أنا لو غنيت في فرح بتاع باشا كبير وحب يعمل معايا بنط بعد الفرح ممكن يسلط عليَّ وألاقي نفسي ورا الشمس، لكن أنا عارف أن الريس قلبه كبير ومبيعملش حاجة غلط وتزعل الشعب منه.
*أنت رحت أدليت بصوتك في الاستفتاء على الدستور؟
- بصراحة علشان ما كنش كداب أنا راحت علي نومة والعيال ما صحونيش مع أني منبه عليهم يصحوني علشان الدستور...وكده كده مرواحي لا كان هيقدم ولا يأخر.. أنا راجل طول عمري بأروح انتخابات وعارف إيه اللي بيجري فيها.
* أنت أغانيك دايمًا بتنتقد النظام... ليه ما حاولتش تنضم لحزب سياسي أو لحركة كفاية؟
-أنا أغني آه ...أزعل الحكومة لأ... دا أحنا عايشين وبندلع على حسها وبصراحة أنا ما أعرفش غير الحزب "الوطني" اللي فيها الريس والحكومة بتاعتنا... وعلشان أكون حقاني أنا لي حبايبي في حزب الوفد وبيكلموني وبكلمهم وأحييت أفراح لناس كتير منهم .. لكن كفاية ما أعرفش هي بتاعة إيه وبيني وبينك بفكر أعمل حزب واسميه الحارة ويكون فيه ولاد البلد الشعبية.
*يا شعبان الناس كلها زعلانة من الحكومة علشان زودت فواتير الكهرباء والتليفون يبقى انت إزاي عايش على حسها؟
أنا ما أقدرش أكدبك في غلو الأسعار وخصوصا الكهرباء.. حاكم أنا بتلدع منها كتير.. ومن يومين لاقيت الفاتورة جا يالي 600 وكذا جنيه.. ولما زعقت مع بتاع الفواتير قالي: انتوا أكيد عندكوا سخان كهرباء وكذا دفاية حلفتلوا بالطلاق أني لسة بستحم على وابور الجاز وبدفى تحت البطانية لكن الحكومة معذورة برضة شوف مسئولة عن كام مليون برضه لازم نراعيها شوية.
*أنت سمعت إن جمال مبارك ابن الريس هيتجوز قريب؟
- ربنا يتممه بخير والله ما حد قالي.
*طب ما بتفكرش تروح تحيي فرحه؟
-أنا في ديك الساعة.. دانا أروح على عيني وأغني للفجر بس حد طرفه يكلمني ويشوف الواجب اللي هأعمله.. أصلك متعرفش أنا بحب جمال بيه أزاي دا راجل محترم ويتخدم من القلب ويستاهل كل خير... لكن هو الفرح أمتى متعرفش؟!
*سمعنا إنك كنت ها تعمل جورنال ...الكلام ده صحيح؟
-صحيح أنا عندي حبايبي صحفيين زي سيادتك كده.. وشاروا علي أن أعمل جورنال علشان أساهم في حل أزمة البطالة ووافقت وكل حاجة لكن صحابي ولاد حتتي نبهوني إني ممكن أروح في الرجلين وأخش في سين وجيم ومشاكل مع الحكومة لو اتكتبت كلمة تزعل حد كبير مني.. وأنت عارف ماليش في القراية والكتابة ودا مش كاري فقلت يا واد ابعد عن الشر وغنيله.
|
|
|
|
|
|
| 
